Nýr veltibíll Brautarinnar

Friðbert Friðbertsson afhendir Einari Guðmundssyni, formanni Brautarinnar, og Jóni Hauki Edwald, framkvæmdastjóra Ökuskóla 3, nýjan Veltibíl. Þórólfur Árnason, forstjóri Samgöngustofu stýrði afhendingunni.

Hekla endurnýjaði samstarfssamning við Brautina síðastliðið sumar og í kjölfarið var sendibíll félagsins endurnýjaður og við það tækifæri nefndi forstjóri Heklu að þeir vildu fara að endurnýja veltibílinn.

Það gerðist svo núna á vordögum að nýr Golf kom frá Heklu og sá Páll H Halldórsson um að láta skipta á bílum á veltibílsgrindinni og fór sú breyting fram í húsnæði Öskju.

Formleg afhending veltibílsins fór svo fram þann 8. maí s.l. og voru það Þórólfur Árnason forstjóri Samgöngustofu og Friðbert Friðbertsson forstjóri Heklu sem vígðu bílinn.  Tækifærið var notað til að nýta gamla bílinn sem nú þarf að farga til að sýna fram á að sá orðrómur sem fór af stað í vetur eftir alvarlegt slys þegar kona ók í Reykjavíkurhöfn að betra væri að vera ekki í belti fari bíll í sjóinn til að vera sneggri út, sé rangur.  Fékk félagið aðstöðu hjá Eimskip til að láta gamla bílinn renna út í sjó með tvær brúður innanborðs, aðra í belti en hina ekki. Lögreglan mældi hraða bílsins og komst að því að bíllinn lenti á 22 km hraða á sjónum og höggið sem verkaði á farþega var 3 g. Það nægði til að beltislausa dúkkan skall með höfuð í framrúðuna og braut hana. Venjuleg manneskja hefði rotast við þessar aðstæður.  Atvikið var myndað bæði innan úr bílnum og utan og mun Samgöngustofa nýta efnið til fræðslu og hefur Ökuskóli 3 þegar nýtt efnið inn í sína kennslu. Félagið vill nota tækifærið og færa öllum þeim sem komu að undirbúningi þessa verkefnis, sem var nokkuð flókinn innilegar þakkir fyrir sitt framlag.

Þeir voru: Eimskip,  Lögreglan,  ALP-bílaleigan, ET, Köfunarþjónustan, Hekla og Ökuskóli 3.