Í dag, laugardaginn 5. október, fór fram Íslandsmeistarakeppni í Ökuleikni á trukkum og rútum. Það var Brautin – bindindisfélag ökumanna sem hélt keppnina í samstarfi við Öskju, Sjóvá, Ölgerðina, Ökukennarafélag Íslands, SBA Norðurleið, Eimskip og Kynnisferðir. Fyrst fór fram keppni í rútuökuleikni þar sem keppendur kepptu annars vegar á stórri rútu og hins vegar á lítilli. Þegar allir höfðu ekið á rútunum var komið að trukkunum en þar kepptu keppendur á Benz Actros kassabíl og hins vegar á litlum Benz Sprinter pallbíl.
Keppnin fór vel fram og var spenann mikil. Raunar fór það svo að tveir voru jafnir í efstu tveimur sætunum í rútukeppninni og þurfu þeir því að leika bráðabana til þess að skera úr um það hvor yrði Íslandsmeistari. Úrslitin urðu þessi:
Rútukeppni
- Jón Sverrir Jónsson, 510 sekúndur
- Finnur Trausti Finnbogason, 510 sekúndur
- Atli Grímur Ásmundsson, 558 sekúndur
Trukkakeppni
- Atli Grímur Ásmundsson, 422 sekúndur
- Ævar Sigmar Hjartarson, 430 sekúndur
- Björgvin gunnarsson, 440 sekúndur
Sigurvegarar dagsins
Keppendur gátu einnig myndað með sér lið og voru veitt verðlaun fyrir efsta liðið í hvorri keppni. Í fyrsta sæti í rútukeppninni varð liði Greyline en í því voru Jón Sverrir Íslandsmeistari og Merk Bogdan sem lenti í 6. sæti. Í trukkakeppninni varð lið Íslandspósts 1 hlutskarpast en í því voru Andri Már Ómarsson og Finnur Trausti Finnbogason.
Trukka- og rútuökuleikni 2013 Úrslit
Það er gaman að segja frá því að Íslandsmeistarinn úr ökuleikni á fólksbílum 2012, Ævar Sigmar, lenti einmitt í 2. sæti í trukkakeppninni þrátt fyrir að hafa aldrei starfað sem trukkabílstjóri. Hann mun hafa tækifæri til að verja Íslandsmeistaratitil sinn á morgun en þá fer fram Íslandsmeistarakeppni í Ökuleikni á fólksbílum. Þar verður keppt á VW Golf, VW Polo og VW UP sem Hekla lánar.
Smelltu hér til þess að skoða myndir frá keppninni
Einnig eru myndir og myndbönd inni á www.instragram.com/brautin sem og Facebook síðu Ökuleikninnar.
Guðmundur Karl Einarsson
5. október 2013 18:53