Brautin - bindindisfélag ökumanna

Ökuleikni Kynnisferða – seinni dagur

Guðmundur Karl Einarsson — Wed, 25 Apr 2012 19:45:06 +0000

Í dag, miðvikudaginn 25. apríl, fór fram síðari hluti Ökuleikni Kynnisferða sem Brautin annaðist. Eins og í gær var keppt í tveimur flokkum: Sprinter og Bova. Keppendur gátu tekið þátt í báðum eða öðrum flokknum. Úrslitin urðu þessi:

A flokkur Bova

Rafn Finnbogason (201 sek)
Sigurður S. Jónsson (211 sek)
Hrafn Hauksson (267 sek)

B flokkur Sprinter

Rafn Finnbogason (144 sek)
Sigurður S. Jónsson (152 sek)
Hrafn Hauksson (194 sek)

Hér má sjá myndir úr keppninni

Ökuleikni Kynnisferða 25. apríl 2012 – Úrslit

http://www.youtube.com/watch?v=f5fndAJAfRo

Ökuleikni Kynnisferða – fyrri dagur

Guðmundur Karl Einarsson — Tue, 24 Apr 2012 21:34:51 +0000

Dagana 24 og 25. apríl stendur Brautin fyrir Ökuleikni á rútum fyrir starfsmenn Kynnisferða. Markmiðið er að auka meðvitund ökumanna fyrirtækisins um nákvæmni í akstri og ökuhæfni. Í dag, þriðjudaginn 24. apríl, fór fram fyrri hluti keppninnar. Keppt var á tveimur bílum: Sprinter og Bova. Keppendur gátu ekið á báðum bílum eða öðrum hvorum.

Í A keppninni á Bova urðu úrslitin þessi:

Karl Hallgrímsson (184 sek)
Sigurður Steinsson (202 sek)
Ólafur Haukur Ólafsson (212 sek)

Í B keppninnin á Sprinter urðu úrslitin þessi:

Karl Hallgrímsson (139 sek)
Ólafur Haukur Ólafsson (148 sek)
Auðunn S. Auðunsson (170 sek)

Smelltu hér til þess að skoða myndir frá keppninni.

Ökuleikni Kynnisferða 24. apríl 2012 – Úrslit

Á morgun, miðvikudaginn 25. apríl, verður svo aftur keppt á Sprinter og Bova fyrir þá bílstjóra sem ekki komust í dag.

Hálkuakstur á Ísafirði 1992

Guðmundur Karl Einarsson — Sat, 14 Apr 2012 17:47:35 +0000

Árið 1992 stóð Bindindisfélag ökumanna fyrir námskeiði í hálkuakstri á Ísafirði. Sjónvarpið fjallaði um málið og var rætt við Einar Guðmundsson og Elvar S. Höjgaard.

http://www.youtube.com/watch?v=StBatyXxYeA

Aðalfundur Brautarinnar 2012

Guðmundur Karl Einarsson — Thu, 12 Apr 2012 11:13:30 +0000

Aðalfundur Brautarinnar – bindindisfélags ökumanna verður haldinn þriðjudaginn 29. maí kl. 18:00 í Borgartúni 41 í Reykjavík (Ökuskóla 3).

Dagskrá fundarins verður í samræmi við 4. gr laga félagsins.

Félagsmenn sem greitt hafa félagsgjöld hafa atkvæðisrétt á fundinum.

Öndunarmælar í öll ökutæki

Guðmundur Karl Einarsson — Fri, 16 Mar 2012 10:06:38 +0000

Frönsk stjórnvöld hafa lagt mikla áherslu á umferðaröryggi á undanförnum árum, með góðum árangri. Nú hafa verið samþykkt lög þess efnis að öndunarmælir sem mælir áfengismagn í blóði ökumanna skuli vera í öllum vélknúnum ökutækjum, sem eru í umferð þar í landi frá og með 1. júlí næstkomandi. Þar er átt við bæði bíla og bifhjól. Þetta kemur fram á vef Umferðarstofu.

Markmiðið er að tryggja að allir ökumenn viti hversu mikið áfengi er í blóði þeirra áður en þeir taka þá ákvörðun að aka af stað. Þetta á einnig við um ökutæki sem koma erlendis frá og verða mælar seldir við landmæri Frakklands.

Eina undantekningin eru hjól sem eru með mjög lítilli vél eða undir 50 kúbikum.

Hrina alvarlegra umferðarslysa og þar á meðal banaslysa, sem m.a. má rekja til ölvunar í upphafi árs 2011 hefur hvatt stjórnvöld til að grípa til þessara aðgerða og einnig var ákveðið að setja upp fleiri hraðamyndavélar á vegum landsins. Það er álit stjórnvalda að þessi lög leiði til þess að menn hugsi sig tvisvar um áður en þeir aka undir áhrifum áfengis á vegum landsins, segir á vef Umferðarstofu.

http://mbl.is/frettir/erlent/2012/03/16/ondunarmaelar_i_oll_okutaeki/

Ökumaðurinn að skipta um mynddisk

Guðmundur Karl Einarsson — Thu, 15 Mar 2012 23:11:10 +0000

Börn sem lifðu af rútuslysið í svissnesku Ölpunum í fyrrakvöld hafa borið um að ökumaðurinn hafi verið að skipta um mynddisk, og setja í þar til gerðan spilara þegar áreksturinn varð. Staðfest hefur verið, að þetta sé til skoðunar við rannsókn málsins.

Alls voru 52 um borð í rútunni þegar slysið varð en börnin höfðu verið í skíðaferðalagi með kennurum sínum og voru á heimleið þegar rútan ók á steinvegg í jarðgöngum. 28 létust í slysinu, 22 börn og 6 fullorðnir. 24 börn eru slösuð og sum þeirra eru í lífshættu.

http://www.mbl.is/frettir/erlent/2012/03/15/okumadurinn_ad_skipta_um_mynddisk/

Heilabilun af völdum áfengisneyslu

Guðmundur Karl Einarsson — Thu, 15 Mar 2012 12:41:31 +0000

Hæstiréttur hefur staðfest úrskurð Héraðsdóms Reykjavíkur um að vistmaður á Landakotsspítala í Reykjavík verði sviptur sjálfræði. Maðurinn er haldinn heilabilun sem stafar af langvinnri og þungri áfengisneyslu.

Í úrskurði Héraðsdóms Reykjavíkur frá því í síðasta mánuði segir að börn mannsins fari fram á sviptingu sjálfræðis. Lagt var fyrir dóminn vottorð yfirlæknis á heilabilunardeild Landspítala en í því segir að heilabilunin einkennist af miklu innsæis- og dómgreindarleysi, íspuna og töluverðu minnisleysi. „Þá sjái hann vegna innsæisleysis ekkert því til fyrirstöðu að neyta áfengis þrátt fyrir heilsutjónið sem áfengisneysla hefur valdið honum.“

Maðurinn var sviptur fjárræði í janúar en í vottorði um heilsu hans vegna þeirrar sviptingar kemur fram að maðurinn sé ekki meðvitaður um, að hann sé ófær um að halda heimili og um persónulega umhirðu.

Þá er frá því greint að maðurinn hafi komið fyrir dóminn og hafi framganga hans verið mjög í samræmi við það sem segi í læknisvottorðum.

Þegar til alls var litið þótti dóminum vafalaust að maðurinn væri ófær um að ráða persónulegum högum vegna heilabilunar og nauðsynlegt sé að svipta hann sjálfræði til þess að veita honum læknisþjónustu.

http://mbl.is/frettir/innlent/2012/03/14/heilabilun_af_voldum_afengis/

Áfengið og þrönga hliðið

Guðmundur Karl Einarsson — Mon, 13 Feb 2012 09:30:23 +0000

Greinin birtist í Brautinni, félagsriti Bindindisfélags ökumanna þann 1. júní 1962.

Það er til fólk, sem er sannfært um, að það sé snjallara við akstur, eftir að hafa fengið sér í staupinu, og enn fleiri, sem segjast aka með miklu meiri varkárni, ef það hefur neytt áfengis.

Við sálfræðideild háskólans í Manchester á Englandi hefur farið fram rannsókn vísindalega á því, hvernig áfengisneyzla verkar á ökuhæfni ökumanna og sömuleiðis, hvernig áfengið verkar á þeirra eigin dómgreind viðvíkjandi ökuhæfni sinni.

Þetta viðfangsefni er býsna athyglisvert, af því að oft heyrast þær fullyrðingar, að menn, sem neytt hafi áfengis, geri scr far um að sýna miklu meiri varkárni í akstri en ella mundi.

Hvernig var þessari rannsókn hagað?

Fyrst voru valdir bifreiðastjórar, sem áttu langan reynslutíma að baki, og þekktir að mikilli ökuhæfni og leikni. Áfengisvenjur þessara manna voru á ýmsu stigi, allt frá algjöru bindindi og til þess að drekka 17 lítra af öli á viku. Vínnautn þekkist tæplega þar meðal manna í ökustarfi. Vagnstjórunum var síðan skipt í þrjá flokka. Fyrsti hópurinn fékk ekkert áfengi, annar 6 cl. af wisky, sá þriðji 17 cl. af wisky.

Stundarfjórðungi eftir áfengisneyzluna hófst prófið, sem var í því fólgið að aka strætisvagni gegnum þröngan gang, sem var takmarkaður með lausum stólpum. Ökumennirnir fengu að ráðgast um, hvaða hliðbreidd þeir treystu sér til að aka bílunum í gegnum, án þess að koma við stólpana. Með þessu var unnt, að kanna dómgreind bilstjóranna um sína eigin ökuleikni. 1 öðrum þætti prófsins var ökumanni leyft að ákveða, hvaða hliðbreidd hann væri reiðubúinn að reyna vrð. Hæfni hans til að aka um ýmsar hliðbreiddir var síðan prófuð.

Vagninn, sem notaður var í þessu prófi var 2.44 m. að breidd.

Af þeim, sem ekki höfðu neytt áfengis reyndu 68% að komast í gegnum hlið, sem var mjórra en bílbreiddin. Af þeim, sem neytt höfðu minni skammtsins, reyndu hins vegar 75% hinna prófuðu, og af þeim sem neytt höfðu stærri skammtsins gerðu 80% tilraun til að aka gegnum alltof mjótt hlið.

Því meira wisky. þeim mun breiðara hlið

Tilraunirnar sönnuðu:

Því meira vín, sem ökumennirnir drukku, þeim mun mjórra hlið töldu þeir sig koma bílnum gegnum.
Því meira wisky, sem þeir neyttu, þeim mun breiðara hlið þurftu þeir, til þess að komast um án þess að fella stöplana. Sem sagt hæfnin minnkaði því meira, sem þeir drukku.
Fífldirfskan jókst, færnin þverraði því meira sem þeir neyttu af víni.

Þessi úrskurður vísindalegrar rannsóknar hefur vakið mikla athygli í Bretlandi og víðar. Og sannarlega er þarna um að ræða þýðingarmikinn grundvöll þeirrar baráttu, sem nú verður að hefja hér á landi gegn aukinni áfengisnautn við akstur. En slíkt ástand ökumanns er nú að verða ein stærsta orsök árekstra og stórslysa í umferð, með öllu því tjóni, hörmum og örkumlun, sem af því leiðir. Og fátt er hryllilegra en brjálaðir menn á vélknúnu farartæki á fjölförnum brautum. Tökum höndum saman gegn slíkum hættum. Burt með áfengisnautn ökumanna.

Árelíus Níelsson

BRAUTIN, félagsrit Bindindisfélags ökumanna. 1. júní 1962.
http://timarit.is/view_page_init.jsp?issId=179546

Hvað kostar leigubíll?

Einar Guðmundsson — Tue, 27 Dec 2011 17:18:57 +0000

Framundan er skemmtilegur tími, áramótin. Tækifæri til að hitta vini og fjölskyldu og fagna saman. Það er ekki óalgengt að fagna nýju ári með því að skála. Margir láta það ekki nægja heldur fá sér í glas í góðra vina hópi sem ekkert athugavert er við.

Þegar gleðinni lýkur getur verið snúið að komast heim ef enginn í hópnum er edrú. Bið eftir leigubíl getur tekið á. Svo er stórhátíðarálag og mun dýrara að taka leigubíl á nýjársnótt svo freistingin að nota bílinn sem stendur við útidyrnar getur orðið nokkuð mikil.

En kostnaðurinn við einn leigubíl er smámunir í samanburði við það sem getur gerst ef við veljum að aka drukkin. Minnsti kostnaðurinn er ef við erum svo heppin að lögreglan stöðvar okkur, þá er það bara 70-160 þúsund auk þess að missa prófið í allt að tvö ár miðað við fyrsta brot og að ekkert annað brot hafi verið framið.

Ef tjón verður, þá er bíllinn ótryggður og það lendir á okkur og margir hafa tapað öllu vegna þess. En það er ekki stærsta refsingin því sá sem verður valdur að slysi eða bana annarar manneskju getur aldrei fyrirgefið sér að hafa valið bílinn í stað þess að taka leigubíl.

Þegar við fáum okkur í glas deyfum við dómgreindina smátt og smátt og þegar að heimferð kemur, er ekki víst að hún sé til staðar til að stoppa okkur. Fyrir bragðið teljum við ekkert mál að aka ölvuð, þó svo við við myndum aldrei láta okkur detta það í hug edrú. Ráðið við þessu er bara að skilja bílinn eftir heima eða afhenda öðrum sem ætlar ekki að drekka bíllykilinn.

Látum ekki ölvunarakstur eyðileggja fyrir okkur áramótin. Er ekki upplagt að eitt af áramótaheitunum sé að aka aldrei undir áhrifum áfengis eða annara vímuefna? Slíkt heit er fjárfesting til framtíðar.

Gleðilega hátíð.

Fórstu á jólahlaðborðið á bílnum?

Einar Guðmundsson — Fri, 23 Dec 2011 11:02:19 +0000

Nú er tími jólahlaðborðanna í algleymingi. Margir skjótast í hádeginu og fara oft á bílnum því vinnan bíður þegar gómsætum veitingum jólahlaðborðsins hefur verið gerð góð skil. Og það er í raun allt í lagi að fara á bílnum en þá verðum við að velja réttu drykkina með matnum, hafa þá óáfenga. Það er nefnilega ekki rétt að það sé í lagi að fá sér einn léttan og aka til baka eftir jólahlaðborðið. Margir halda að það sé í lagi þar sem hans er neytt með mat.

Þó áfengisáhrifin séu minni vegna matarins, þá breytir það ekki hlutfalli áfengisins í blóði. Sumir telja að leyfilegt sé að hafa smá ágengismagn í blóði þar sem refismörkin eru 0,5 prómill. En umferðarlögin eru skýr: ekki má aka eftir að hafa neytt áfengis. Lögreglan mun ekki heimila akstur þó prómillmagnið sé 0,3 eða 0,4 því það er einnig brot á umferðarlögunum.

Við getum flokkað ökumenn sem aka undir áhrifum í nokkra flokka. Meðal þeirra eru þeir sem gera það vegna þess að þeir telja að lögreglan nái þeim ekki, sér í lagi þar sem þeim tókst það síðast, og svo eru þeir sem telja sig yfir umferðarlögin hafna og mega brjóta þau að vild, bæði hvað hraða og ölvun varðar.

Í báðum tilfellum erum við hin sem í umferðinni aka í hættu ef við mætum þeim. Þeir hugsa bara um sig og sínar þarfir. Myndu þeir leyfa sér að aka í þessu ástandi eftir þeirri götu sem barnið þeirra leikur sér við? – Líklega ekki, því þá snertir það þeirra eigin hagsmuni.

Ég vona að þú lesandi góður sért ekki í þessum hópi. Hafirðu hins vegar ekið undir áhrifum áfengis eða annara vímuefna er ekki of seint að snúa blaðinu við. Það er ákvörðun okkar sjálfra hvernig við hegðum okkur í umferðinni. Sýnum þá ábyrgð að aka ekki undir áhrifum áfengis eða annara vímuefna og gefum okkur það í jólagjöf.